. Silahisabungan Sitolu Ina: Padan Dekke Nanilaean
SELAMAT DATANG di BLOG RESMI KAMI SILAHISABUNGAN SITOLU INA DAN TERIMAKASIH ATAS KUNJUNGAN NYA,TERIMAKASIH...

18 Feb 2012

Padan Dekke Nanilaean

TONA NI OMPUNTA BORU NI OMPU RAJA NABOLON DOHOT OMPUNTA DOLI SILAHISABUNGAN TU : si RAJA TAMBUN dohot SILALAHI RAJA

“On ma da Ompung Debata Mulajadi Nabolon, dengke hilaean, sai lae ma roham mangalehon parhorasan dohot panggabean tu anakkon, on ma na manggagat-gagat di limut na mangaliat-liat di batu, sai dapotan gagaton ma anakkon, sai dapotan dilaton, sagu-sagu ditompion na godang, asa manompi mas manompi pangomoan, rudang na jagar asa jagar barita horas, jagar barita gabe di anakkon; lanjang-lanjang purun-purun jonggi hais, asa hais na so marlobu, hais nipi na sambor. Jonggi manaek asa naek-naek sorga ma anakkon, marganda-ganda padi, siganda sigandua sipusuk ni podom-podom, na sada gabe dua anakkon, na tolu gabe onom. Manarsar ma onsong on mange-mange, mangararat songon singa tor. Padan ma on na hutonahon tu anakkon : 
 ASA SISADA LULU ANAK SISADA LULU BORU MA ANAKKON NA SO JADI MASIPAETEK-ETEHAN. TAMPUK NI ATE-ATE DO HAMU AMANG URAT NI PUSU-PUSU. ASA HO AMANG SIRAJA TAMBUN, INGKON SONGON AEK NI UNTE MA SILALAHI RAJA ON DI HO SIPADOIT-DOITON, BUNGA NI SIRA SIPAGUT-PAGUTON. HO PE AMANG SILALAHI RAJA, MOLO HOLONG ROHAM DI ANAK SIMALOLONGMU, SONGON I MA HOLONG NI ROHAM DI ANGGIM SIRAJA TAMBUN ON. ASA ON MA TONA NAMI SIINGOTONMUNA SAHAT RO DI PINOMPARMUNA.”
“Asa nuaeng pe Amang baen ma pasu-pasu tu anakta on, asa borhat hamu dohot si Raja Tambun” ninna ompunta boru, boru ni Raja Nabolon tu Silahisabungan.

Dung i didok Silahisabungan ma mangalusi:”Ai nunga didok ho sude hata na denggan i, sai sahat ma tutu dijalo tondi ni anaktaon. Asa nuaeng pe amang si Raja Tambun, sai torop mabue ma pinomparmu, gabe ma ho jala mamora, tumpahon ni Ompunta Mulajadi, masuak dangka ma ho rahut-rahutan, tarida utar ho tambus-tambusan, sai ingot ma ho tona na dompak haham Silalahi Raja. Ho pe amang Silalahi Raja, pasu-pasuonku do ho, sai gabe ma ho jala mamora, sai dilehon Mulajadi Nabolon ma di ho biti-biti, boto-boto, sai unang ma ho lolos di hata, lupa di tona. Sogot-sogot ni andigan sai jaloonmu dope pasu-pasu sian ate-atengku, sai ingot ma tona na dompak anggim si Raja Tambun.”

Tidak ada komentar:

Poskan Komentar

Tinggalkan Komentar Anda disini...