Rencana pemugaran Tambak Silahisabungan di Dolok Paromasan thn 1947 yg gagal krn invasi Belanda

Dung mulak Abdul Malik Tambunan, Domitian Tambunan dohot Manarak Tambunan (A ni Marhansing), laos di taon 1947 I dipalolo Abdul Malik Tambunan rapot di Onan Raja Lumbanpea di sude pangituai ni pomparan Tambun Holing i ma sian Lumbanpea, Lumbangaol, Baruara, Pagaraji dohot sian Sunge, songon i nang sian angka boru diampuan, marsada roha laho mambangun tambak ni Ompunta I di Dolok Paromasan. Asa hatip so haribo-riboan tambak i.

Disusun ma panitia jala dipilit soara torop jala goar ni panitia i, i ma : Panitia Tambak ni Silahisabungan di Dolok Paromasan, ia susunan ni Panitia i songon ma :
Ketua                             : Abdul Malik Tambunan Ompu Si Anjur Lumbanpea
Setia Usaha                  : Raja Epraim sian Baruara
Bendahara                    : Guru Frederik sian Buntu Raja Lumban Gaol
Commisarissen : Sada halak sian ganup horja pinompar ni Silahisabungan, songon
i sada be sian inganan pangarantoan

Jadi dung mardalan panitia i, mambahen angka rapot di sude inganan ni Pinompar ni Raja Silahisabungan, dapot ma keputusan taringot tu guguan tu tambak i, i ma:

1. Nasa batu dohot pasir na ringkot tu pemugaran Tambak i di Dolok Paromasan, sian pomparan ni Raja Silahisabungan na di Pulo Samosir dohot na humaliang
2. Nasa boras sipakkeon di pesta na, sian Pomparan ni Raja Silahisabungan na di Toba Holbung
3. Nasa simin na porlu tu Tambak i, sian Pomparan ni Raja Silahisabungan na tinggal di Tapanuli Selatan dohot na di Sumatera Barat
4. Nasa hepeng upah tukang, horbo dohot sude biaya tu pestana, asing ni naung rade di ginjang i, sian Pomparan ni Raja Silahisabungan na di Sumatera Timur dohot na di Jawa, Kalimantan, Sulawesi.

Alai marisuang do ulaon ni Panitia i, alana dung taon 1948, masuk ma tentara Bolanda dohot sekutu tu Tapanuli, tu Samosir dohot tu Toba mambahen putus hubungan jala margurilla ma hita sahat tu taon 1950. Mardomu muse tu tingki na mangihut, na terjadi di peristiwa – peristiwa di Lumbanpea sandiri, i ma parbadaan ni Lumbanpea dohot tentara sian Balige ( mula na ala partandangon ni tentara i tu Tambunan), jadi gabe urusan na balga on. Alai gabe reda do muse dung laho Abdul Malik paboahon na masa i tu Propinsi di Medan.

Marudut ma muse tu perang saudara di pemberontakan mulai sian taon 1956 sahat tu taon 1960. Ingot Kol M Simbolon.

Di taon 1969 saut ma peletakan “batu pertama” di Tambak ni Raja Silahisabungan di Dolok Paromasan. Diadopi pinompar ni Raja Silahisabungan, i ma Silalahi Raja dohot pinompar ni si Raja Tambun, songon i nang sude hula-hula pinompar ni Simbolon Tua, Tamba Tua, Saragi Tua, Munte Tua dohot Nahampun Tua, i ma iboto ni Si Pinta Haomasan.